नाशिक जिल्ह्यातील नगरपरिषद निवडणूक निकाल २०२५ | नाशिक जिल्ह्यात शिवसेना टोपवर

नाशिक जिल्ह्यातील नगरपरिषद निवडणूक निकाल २०२५ | नाशिक जिल्ह्यात शिवसेना टोपवर  

नाशिक जिल्हा शिवसेनाचा बालेकिल्ला 

नाशिक जिल्ह्यातील नगरपरिषद निवडणुकीचे निकाल जाहीर होताच राजकीय चित्र स्पष्ट झाले आहे. या निवडणुकीत महायुतीने जोरदार मुसंडी मारत जिल्ह्यावर आपली पकड अधिक मजबूत केली असून, महाविकास आघाडीला मोठा धक्का बसला आहे. विशेष म्हणजे नाशिक जिल्ह्यातील 11 पैकी एकाही नगरपरिषदेत महाविकास आघाडीला नगराध्यक्षपद मिळवता आलेले नाही.

महायुतीचे वर्चस्व, शिंदे शिवसेना आघाडीवर

या निकालांमध्ये मुख्यमंत्री एकनाथ शिंदे यांच्या शिवसेनेने सर्वाधिक पाच नगरपरिषदांवर नगराध्यक्षपद मिळवत सर्वात मोठा पक्ष म्हणून आपली छाप सोडली आहे. भाजप आणि अजित पवार गटाची राष्ट्रवादी यांनी प्रत्येकी तीन नगरपरिषदांमध्ये विजय मिळवला आहे. महायुतीतील हे पक्ष काही ठिकाणी स्वतंत्रपणे, तर काही ठिकाणी परस्परविरोधात लढले असले तरी अंतिम निकालात फायदा मात्र महायुतीचाच झाला आहे.

महाविकास आघाडीचा संपूर्ण पराभव

काँग्रेस, उद्धव ठाकरे गटाची शिवसेना आणि शरद पवार गटाची राष्ट्रवादी या महाविकास आघाडीतील पक्षांना नाशिक जिल्ह्यात एकही नगराध्यक्षपद जिंकता आलेले नाही. काही ठिकाणी अपवादात्मक लढत झाली असली तरी निकाल पाहता मतदारांनी स्पष्टपणे महायुतीच्या बाजूने कौल दिल्याचे दिसते.

चांदवड, नांदगावमध्ये सत्ता कायम

चांदवड नगरपालिकेत भाजपने विजय मिळवत आपला झेंडा फडकवला. भाजपचे वैभव बागुल नगराध्यक्षपदी विजयी झाले असून, नगरसेवक पदांवरही भाजपची कामगिरी मजबूत राहिली.
नांदगावमध्ये आमदार सुहास कांदे यांनी आपला गड राखत शिवसेनेचे सागर हिरे यांना नगराध्यक्षपदी विजयी करून आणले. येथे शिवसेनेच्या उमेदवारांनी बहुसंख्य जागा जिंकत विरोधकांना फारशी संधी दिली नाही.

11 नगरपरिषदांचे निकाल थोडक्यात

नाशिक जिल्ह्यातील भगूर, येवला, सिन्नर येथे अजित पवार गटाच्या राष्ट्रवादीने विजय मिळवला. नांदगाव, इगतपुरी, सटाणा, त्र्यंबकेश्वर आणि मनमाड येथे शिवसेनेचे उमेदवार विजयी झाले, तर चांदवड, पिंपळगाव बसवंत आणि ओझर येथे भाजपने बाजी मारली.

Amazon वर शॉपिंग करन्यासठी येथे क्लिक करा

मतदारांचा सक्रिय सहभाग

या निवडणुकीत मतदारांचा सहभागही लक्षणीय राहिला. काही नगरपरिषदांमध्ये 70 टक्क्यांहून अधिक मतदान नोंदवले गेले. सायंकाळच्या सत्रात मतदान केंद्रांवर वाढलेली गर्दी ही मतदारांच्या उत्साहाची साक्ष देत होती.

एकूणच, नाशिक जिल्ह्यातील नगरपरिषद निवडणुकीत महायुतीने स्पष्ट वर्चस्व सिद्ध केले असून, येणाऱ्या काळात स्थानिक राजकारणाची दिशा या निकालांमुळे बदलणार असल्याचे संकेत मिळत आहेत.